درمدح ومنقبت فاطمه معصومه

در مدح و منقبت حضرت فاطمه معصومه

فاطمه آدلی بیر قیزام زینت آل حیدرم باب الحوایجه لقب، عشق گویونده اخترم

عرشیده واردی منزلیم گون کیمی من منورم صاحب جام جم منم، والی عشقه دلبرم

موسی جعفره قیزام واردی تبوله نسبتیم اوجیده پروران منم باشدان آشوبدی عصمتیم

فاطمه دور منه آنا فاطمه اولدی شهرتیم درگهیمه گلن گوروب گنج کرامته درم

ثبت اولوبدی بیزلرون آدونا عزت و شرف بیزلر اوچون صراط حق اولدی بو دهریده هدف

نسبتمیز اولوب بیزوم شاه شهید و هم نجف مریم و هاجره اوزوم تک نفره برابرم

بارگهمیدن عطر آلور دیر و کنشت و هم بهشت کیم گله پای بوسیمه خوش اولاجاقدی سرنوشت باش ائری مقامیمه مسجد و دیر و هم کنشت ناظر عمر لر منم روز قیامته داورم

فاطمه تک آدوم اولوب شهره هفت شهر عشق عشق بولوندا اولموشام دلبره کوی و بحر عشق جاری اولوب بوگون هریره بحروبر عشق کیم تانوموردیوم اونا دخت رسوله دخترم

بارگهیمه چوخ گلر سائل و شاه و مستمند حاجتونی دئیر منه وردی اولان چو دردمند

چون بولوری بو یر اولوب قرب خدای ارجمند فرشیده ساکتم ولی عرشیده ماه انورم

درگهیمی آچان گورر نوردی او یره جلا چوخلی زمانی چکمیری غصه و غم تاپور دوا

بوش الی له قایتموری شاه اولا یا اولا گدا کریمه دور آدوم منیم شأن کریمه زیورم

اولدی آتام بو دهریده امتون عالی رهبری شهر به شهر آدیدور اولدی جهانین ازبری قارداشمون رضا آدی عالمین اولدی سروری صورت وسیرتن اوزوم هرایکسینه بنزرم

گون ده تاپوبدی درگهین نورینه هر زمان نیاز عترت آل مصطفی اولدی جهان چاره ساز

عالم اوزونه مرتضا ایله دی درگهینی باز اوز آتامون مطیعیم اهل ولایه سرورم

قارداشیمون رضا آدی عالمین اولدی سروری شهر به شهر آدی دور اولدی جهانون ازبری اولدی آتام بو دهریده امتون عالی رهبری صورت و سیرتن اوزوم هر ایکی سینه بنزرم سائل درگهیمه من اذنیله ایله رم عطا بو حرمی خدا ایدوب دردی اولان لاره دوا کیمسه گله بو درگه ایتمیه جاقدی او خطا توبه نی ایله ین بولور شافع روز محشرم سایه لطفونه آلوب سایه سالان بو عالمه موسی جعفره قیزام درسی ویروبدی آدمه فخر ایدرم که نسبتیم واردی جهاندا خاتمه فاطمه دور منیم آنام نور دو عین حیدرم مات قالوبدی عرشیان تا کی گوروب جلالیمی اولسا بصیرتون گوزی ایشق گور هلالیمی زینبه بنزرم آچام سینه ده کی ملالیمی فاطمه نون قیزی کیمین دهریده قاره معجرم اهل مدینه اولدولار مکتبومون محصلی فاطمه آدونا باخون اولدی جهانون حاصلی مشکلی برطرف اولار کیمسه دئین مشکلی فاطمه نی سئون لره فاطمه مثلی دلبرم عشق رضایه خاطری ورموشام ال بو هیجرته شهر پیمبری قویوب گلدوم اوزوم بو غربته تا گورم اوز امامیمی ال یترم سعادته شام و سحر رضا آدی اولدی دیلمده ازبرم ظلم اولاندا زینبم خطبه لریمدی ذوالفقار ریب و ریانی ایله رم کوی و مکاندا آشکار گرچه گورم آنام کیمی درد و غمیله هم فشار خصم زبون گورر رضی لشکر دینه لشکرم یازما قامدح و مدحتون هچ قلمون توانی یوخ شاعر اگر اولا بو دهر هچ قلم و بیانی یوخ کیم دیور حیدرون قیزی اختر و آسمانی یوخ «رود گل» عرض ایدور خانم بو درگهیوه نوکرم

برای کریمه اهل بیت

ای جلالینه ایدن غبطه جهان معصومه جان نورینه محتاج اولان هفت آسمان معصومه جان

ای مقامینه یاراشموش نسبت آل رسول دختر موسی ابن جعفر بنت زهرای بتول

بارگاهوندان اولان انعام بسیاری نزول باش چکر بو بارگاهه عرشیان معصومه جان

اخذ ایدن جاه و جلال دینله هم عصمتی فاطمه مثلی آلان اوز خالقیندن قیمتی

یای لانان دنیا بویوندا عزتیله عفتی آدیوا فخر ایله یر کون و مکان معصومه جان

کیمسه دور اولدی رضایه بحر و بر ایچره باجی درگهیندن بوش یولا سالموب خداوند محتاجی

سائل درگاهون اولدی دهریده عالی حاجی تاپدی درمان دردینه هر باغریقان معصومه جان

کیم کریمه سسلنوب کیم آچدی باب رحمتی کیم گلوبدی بارگاهن تاپدی عز و عزتی

سفره ی احسانیوین گیدمز آغوزدان لذتی دست ردی گورمیوبدی دشمنان معصومه جان

جعفر صادق بولوب بو بارگاهی جان پناه جنته یول آختارانه اولدی بویر عالی راه

پاک و پاکیزه اولار قویسا قدم غرق گناه چون شفاعت چی اوزون سن هر زمان معصومه جان

قبر زهرا آختاران بو یردن عطر و بو آلور فاطمه آدیله گلسه گورنه آب رو آلور

تشنه ی آل علی بو یرده جام سو آلور اولدولار سیراب چوخ تشنه لبان معصومه جان

شهر علم و معرفت سنله تاپوب عز و مقام بو مکاندا قوزویوب باش اهل ایمان و قیام

هر گئجه گوندوز گلور زوار ویر سونلر سلام بارگاهوندور جهانه چون جنان معصومه جان

ترک قیلماز دردمند تا آلماسا درده دوا نا امید اولمور گلن بو درگهن شاه و گدا

باغلانوب زنجیره عشقیوه سنون چوخ آشنا محترم اولدی بو یرده عاصیان معصومه جان

مریم و سارا تاپانموبدی بو عز و عزتی زینب و زهرا کیمی آلدون خدادن قیمتی

آختارانار جنتی گوردی بو یرده جنتی باغ رضواندور بویر بورداعیان معصومه جان

باب رحمت آختاران بویر هماندور گل بورا شان و عزت آختاران بویر هماندور گل بورا

مهر حاجت آختاران بویر هماندور گل بورا بوردا آرامش تاپوبدی خسته جان معصومه جان

بارگاهیوی بولوب جدین اوزونه چون حرم اهل بیت ، قم شهرینی بولدی جهاندا محترم

فخر ایدر اولسون ملائک بارگاهن چون خدم چون حریم امن دور، دارالمان معصومه جان

اوز قیزونا من فداک سولویوب ختم نبی ایلوب تکرار تنها بو سوزی موسی لبی

بو مقامی سنده تاپدون آلموسان و منصبی مهر و امضانی وروب شاه جهان معصومه جان

فاطمه معصومه دورسنده خانم معصومه سن بیمه ی زهرایه هرآنی اوزونده بیمه سن

دشمنه اهل نفاق و خصم اهل کینه سن فاش ایتدون بو سوزوی هر آن عیان معصومه جان

هر گدا آچسا الین احسان ایدر اهل کمال رد تقاضا اولمویوب گر ایستسه هر نوع مال

شه قیزونون تحفه سی ایتمز مگر آسوده حال؟ حاجتیله گلمیشم چون سائلان معصومه جان

عاجز اولدی تا یازا بیر عالی مدحی بو قلم اهل بیت ایلوب منی بو بارگهده محترم

«رود گل» ایستور آلا سندن مدال محتشم آمدم بردرگهت چون خادمان معصومه جان

افتخاریمدی بو شان و عزتی زهرا ویروب باش اوجالوق قطره یه دنیا بویی دریا ویروب

بو مقام شاعر اولماقی منه مولا ویروب سئولورم بیرده منم چون خادمان معصومه جان